علاش ما حكيتش على تقرير محكمة المحاسبات؟
موش صحيح، تحدثنا في الموضوع يوم صدور التقرير و عطيت فيه رايي و شكرت المحكمة.
اي ماك تحارب في الفساد، شبيك ما تكلمتش؟
نتكلم على شنوة تحديدا؟ ياخي هذه هي محاربة الفساد؟
محاربة الفساد كنائب، هي البحث في الملفات، تحريكها، كشف المستور و العرك مع الي تخاف منهم الناس الكل و جمع الوثائق و الأدلة، حتى يصل ملف متكامل للقضاء.
لكن، لما القضاة تخدم و تحقق و تحيل المتهمين للقضاء؟ شنوة عندي نعمل مثلا؟
آسف!
ثمة ناس مانيش بش نقول شكونهم “التيار الديمقراطي” فالحين في الحديث الإستعراضي على الفساد، يسخايبو محاربة الفساد بالعياط و التشهير و الأفلام و بالطبيعة فساد الناس الأخرى، و بالطبيعة حتى فساد الناس الأخرى يخرج فقط كيف يوليو معادش حلفائهم.
ماناش كيفهم!
محاربة الفساد ماهيش بلاطوات و عياط و تشقشيق أحناك!
هي عمل مركز و دؤوب و شاق و مخطر!
سامحني في عمل محكمة المحاسبات، شنوة الي خدمتوه إنتوما؟ فاش ساهمتو؟ امالة شبيكم خارجين في كل منبر و كأن الخدمة خدمتكم!
باهي شنوة طالبين؟ المحكمة احالت المتهمين الكل للقضاء و التقرير علني منشور للعموم! فشنوة طالبين بالضبط 🙂 ؟
محاربة الفساد عندكم “إحكي على هذيكا”.. حديث
عندنا؟ إخدم على هذيكا! عمل!
وراهو الماتش مع الفساد له معنى قبل ما يزفر الحكم، و الحكم يزفر كي يوصل الموضوع قدام القضاء! وليت نفهم في الكورة توة و نأكدلكم إنه الأهداف بعد ما يزفر الحكم و تتحال المتهمين للقضاء ما تتحسبش راهي!
صبيانياتكم تأكد يوما بعد يوم، إنكم ماكمش متع تكويرات صحاح، أقصى حدكم، الاحد الرياضي، التبهبير بالفارغ بعد ما يوفى الماتش.
نتفهم وجعكم و حرقتكم و هوسكم، و الي ما قعدلكم كان السبان و الحديث كي ما نجمتوش الخدمة! أما برشة هكة!
نزيدكم علاش سكتت على التقرير؟
حشمت على روحي!
صحيح ماناش حزب، صحيح ما عندناش لا عمركم لا تجربتكم لا مقر بالكريدي، لكن التقرير حط 3 مخالفات لأمل و عمل (أجبنا عليها المحكمة).
صحيح ماهيش مخالفات خطيرة و ناتجة عن نقص خبرة، لكن كي عندي مخالفات، بأي شرعية نحل فمي على مخالفات غيري الي ديجا قدام القضاء!؟
الجمل ما يراش حدبته!
كي لقينا عندنا مخالفات، قلنا قبل ما نتهموا غيرنا، هات نصلحوا أرواحنا قبل! باش ما نوليوش كيفكم : إبليس ينهى على المنكر!
هات خلي نحكي على تقرير المحكمة لجماعتكم الي فرحانين بالعياط و الأفلام متاعكم و ما قراوش التقرير :
وصولات التبرع لمحمد عبو لم تحتوي التنصيصات الوجوبية (الصفحة 45 من التقرير)، معناها ثمة ناس تبرعتله، أعطاها بونوات و البونوات لقاتها المحكمة مخالفة.
محمد عبو لقاتله المحكمة وسائط إشهارية في الأكحل! غير مدرجة في الحسابات المالية المقدمة للمحكمة (الصفحة 60).
الصفحة 63 : محمد عبو مخالف للفصل 35 من قرار الهيئة عدد 20 لسنة 2014 و الفصل 83 من القانون الأساسي عدد 16 لسنة 2014
الصفحة 65 : محمد عبو عنده نفقات لم يقدم وثائق إثبات في شأنها.
الصفحة 84 : محمد عبو عنده صفحات تخدمله لم يعلم بها المحكمة
الصفحة 89 : محمد عبو عنده دعاية إنتخابية خلال الصمت الإنتخابي.
الصفحة 91 : محمد عبو عنده فلوس قيدها على الحملة و هي خارج الفترة الإنتخابية.
الصفحة 91 : محمد عبو صرف فلوس لا تهدف لنيل ثقة الناخب و قيدها على الحملة الإنتخابية.
الصفحة 98 : محمد عبو عنده إخلالات في التزكيات
نجيو للتشريعية، يا جماعة محاربة المال السياسي الفاسد و الي تحبوا نحكيو على تقرير دائرة المحاسبات، هات نشوفوا إش يقول التقرير في التشريعية :
- التيار الديمقراطي نابل 1 : عطات تقرير مالي فارغ! خالي من اي عملية و لا يغطي الفترة الإنتخابية! بالفلاقي : خدموا بالسترة و لا دخلت لا خرجت فلوس و لا ثمة فلوس من أصله (صفحة 19).
- التيار الديمقراطي الأمريكيتين و بقية العالم، إيطاليا، تونس 2 : خلصوا فلوس من حسابات شخصية و قيدوها على الحملة 🙂
- التيار الديمقراطي نابل 2، ألمانيا، تونس 1 : عملت تظاهرات غير مصرح بها (الصفحة 24).
- الصفحة 66 : 10 قائمات للتيار الديمقراطي قيدت فلوس على الحملة و هي خاطية الحملة!
- الصفحة 127 : التيار الديمقراكي فرنسا 1، فرنسا 2، الدول العربية، نابل 1 : سجل المداخيل مخالف
- الصفحة 128 : التيار القيروان، صفاقس 1، صفاقس 2، تونس 1 : سجل نفقاتها مافيهش الفلوس الي دخلت و خرجت الكل
- الصفحة 132 : التيار القيروان، ما جابش إثباتات للمصاريف
- الصفحة 145 : التيار سوسة، القيروان، إيطاليا، الأمريكيتين، تونس 2، بنزرت : دخلتلها فلوس ما حطوهاش في الحساب البنكي الوحيد، مشات من غادي لغادي
- الصفحة 158 : التيار مدنين، بما إنه القانون يمنع مصاريف نقدية أكثر من 500 دينار، قسم الفلوس على أكثر من دفع باش ينجم يخالف القانون.
- الصفحة 164 : التيار الكاف، فرنسا 1، نابل 2، تونس 1 : ما جابوش وثائق لإثبات نفقات، هانو بالهمة و برة
- الصفحة 170 : التيار مدنين قام بتضخيم نفقاته
و طلعوا شكون عنده 13 مليون تمويل مجهول المصدر، يعني مال سياسي فاسد 🙂 تره طلعوا! 🙂
و نزيدكم! تقرير محكمة المحاسبات لم يستثني أحدا! الناس الكل مخالفة! الكل! كل الأحزاب و الإئتلافات!
نعرف جماعة البسكلات.. فسادهم إخلالات و إجتهادات خاطرهم ملايكة، فقط فساد غيرهم فساد، تعلمناكم كيفاش تخمموا من حكاية الكمامات.
إنتوما برك النظاف 🙂 و فهمناكم تؤمنون ببعض القانون و تتركون بعض!
لذا، الإخوة في التيار، قبل ما تبعثوا مدونيكم و قواعدكم و “مانيش تياري و لكن” تسب في الناس، صلحوا رواحكم قبل.
نلخص إذا :
- كنا أول من حكى على تقرير محكمة المحاسبات
- محاربة الفساد عندنا هي خدمة الملفات بهدوء و عمق حتى توصل للمحكمة، موش نستناوها توصل للمحكمة و نوليو نفلموا بخدمة غيرنا
- ما سبينا و ما شهرنا بحد ، بل ركزنا على المشاكل الي عندنا باش نحسنوا رواحنا قبل و دعينا لحوار لتفادي المشاكل في القانون و لتدعيم الرقابة، خاطر باش تشهر بالناس يلزم ما تكون عندك حتى مخالفة، التقرير منشور للعموم و تحال المخالفين للمحكمة للقضاء باش ياخذوا جزائهم فدور الفاعل السياسي هو “كيف لا يتكرر ذلك” موش يغطي حدبته و يكبر حدبة غيره بالأفلام وزيد الكلها بحدبها!
- وقيت باش تنساو حكاية الفخفاخ و تكبرو شوية و تتجاوزوا جراحكم، هاكم شفتوا، كل ما تبعثولنا صبيانكم تتلاكش علينا، تجدون ما يسركم 🙂
نجدد الدعوة لتطبيق القانون على الجميع و لحوار مجتمعي هادئ : التقرير عطى توصيات مهمة جدا تنجم تحسن العمل السياسي و تقوي قدرات الرقابة و تستحق الإهتمام و تستحق تحويلها لتشريعات : هذا ما يفعل السياسيون، فياريت نقوم بدورنا و نترك دور القضاة للقضاة من اللحظة التي يتعهدون بها به.
20
0
39
20