بيان في 28 فيفري 2021

السيدات و السادة المواطنات و المواطنين،

أمل و عمل، في خضم الهيكلة و التحول إلى حزب سياسي، عصري ديناميكي و نظيف و يقدم الإضافة.

أجرينا عديد المشاورات و الإستطلاعات و الورشات.. ثمة كلمة رجعتلنا ديما :”ماكمش واضحين” “ما فهمناكمش”

لقينا زادة، برشة ناس عندهم فكرة على مواقفنا من بعض القضايا، أحنا بيدنا ما في بالناش بالمواقف هذيكا 🙂

فكرنا و لقينا الي الناس الي إنتقدتنا على هذا الأساس، عندهم الحق و ثمة برشة وجاهة في مؤاخذاتهم : إنغمسنا في العملي، حلان المشاكل، خدمة كل التونسيين، و لم نوضح لرواحنا و للناس، بصفة شفافة كاملة مواقفنا من القضايا الخلافية في تونس.

لذا، قررنا، نجمعو 100 قضية على الأقل، سواء مجتمعية (المثلية، الميراث..)، إقتصادية (تحرير الدينار، المنشآت العمومية..)، سياسية خارجية (حل الدولتين في فلسطين، العلاقة مع أوروبا..)، بيئية، طاقية، ثقافية، تعليمية..

و هال 100 قضية هاذم، بش نتداولوهم بيناتنا و نخرجوا فيهم بإذن الله موقفنا الواضح و العلني.

لذا، أطلب منكم بكل بلطف : ثمة أي قضية، داخلية أو خارجية، إجتماعية أو إقتصادية أو سياسية من الطلاق حتى البنك الدولي، يهمكم تعرفوا فيها راي و موقف و توجه أمل و عمل و راي النائب عن الحركة ياسين العياري؟

(ينجموا يكونوا مختلفين و سنفصح عليهم الزوز، أمل و عمل ماهيش حركة ستالينية متع الصوت و الرأي الواحد)

فقط إبعثلنا شنية القضايا الي تهمك و ياريت مع بعض المعطيات: العمر، الجنس، الولاية.. (بالطبيعة بعثان هذه المعطيات إختياري) على :

contact@mouvementamal.com

باش نطرحوها على رواحنا و تكون الإجابة ضمن وثيقة إعلان الحزب.

شكرا مسبقا على المساعدة.

أمل وعمل

ماينفع الناس

الهيكلة