أزمة تخزين الحبوب

أزمة تخزين الحبوب.. سمعتم الجميع.. فهل تحدثتم مع الفلاح؟
نحن فعلنا!

منغير برشة كلام كبير، أزمة التخزين سببها : الدولة تاخذ شكارة القمح على الفلاح ب60 دينار،إلا في فترة محدودة، تاخذها ب 75 دينار.

ماذا يحدث؟ الفلاحة الكل تولي تحصد فرد وقت للتمتع ب15 دينار الزايدة، 60 دينار ما تخلصش.. هي حتى ال 75 ما تخلصش كيف تجي تشوف، لكن هذاكا موضوع آخر..

المفروض، دولة تحترم روحها، عندها قليل من التخطيط، ملي يظهر كأنه العام صابة، يكفي تخرج بلاغ بتمديد الفترة 3 أشهر، هكة الفلاحة ما تحصدش فرد وقت و ما تصيرش أزمة متع تخزين.

حل بسيط، سهل، ممكن، كان ينجم ينقذ القنطارات الي ريناها مكدسة على التراب تحت رحمة الريح و المطر في بلاد تستورد في القمح.

كيفاش وصلنا هنا؟ شكون نحاسبوا على ما حدث؟ كلمة وحدة : أحزابكم و نوابكم.
الشعب لا ينتخب الوزراء، بل ينتخب نوابا و هاذوكم الي يحاسبهم!

الفاشل سمير بالطيب وصل وزير فلاحة في إطار صفقة، بيعة و شرية، و نوابكم إلي إنتخبتوهم أعطاوه الثقة رغم علمهم بمحدودية مداركه و غياب أي معرفة أو تصور أو برنامج عنده، الصفقة إنه يشد 3 سنين وزير باش يكمل حياته بتقاعد وزير.

لإرضائه، ضحاو.. بالفلاحة!

أحزاب و نواب في برامجهم برشة كلام على الفلاحة.. نظريا، في الواقع ؟ حطولهكم سمير بالطيب

و هذه قائمة من أعطاه الثقة :

https://majles.marsad.tn/2014/vote/57c0e020cf44123b7174acda

غدوة، نواب أمل و عمل المستقلة، مستحيل يعطيو الثقة لوزراء من نوع سمير بالطيب : فقط الوزير الي فاهم فاش يحكي و عنده طرح جدي نصوت له، الصفقات الحزبية، موش بفلاحتنا!

النواب هم من يحاسب دائما.. اليوم ما تبكيش على صابة الحبوب و قبلها البرتقال، أنت ساهمت في هذا، سواء بالتصويت لهؤلاء أو عدم التصويت!

التصويت عمل جدي، يستحقوه ناس جدين، و باش تعرف الناب أو الحزب جدي؟
يحكي بعقلانية بمنطقية بدون عواطف و يقدم حلول لا خرافات “هذيكا في خطر” مع توصيف دقيق للواقع لكن ما يكفيش .. حاسبهم زادة على القديم خاطر الكلام ساهل الفعل أصعب .. أو أبشر، جمعة إتدز في صدرك فرحان “جماعتك ربحوا” و 5 سنين.. تدفع الثمن.

نحن جديون، هات حاسبونا قبل ما تنتخبونا!

(الصورة إلتقطناها لما زرنا سي حسن الشتيوي، فلاح يزرع الحبوب منذ 45 عام و مكتشف بذرة تونسية تنجم تعطي 195 سبولة رفقة هاجر الشباح مهندسة فلاحية رئيسة قائمة أمل و عمل المستقلة بمنوبة، مشينا نسمعوا في مشاكل الفلاحة، من عند الفلّاحة

للتعرف أكثر على عم حسن و البذرة الجديدة https://bit.ly/2MTjTJj )

أملوعمل_المستقلة